حكاية بنت اسمها مصر . كلمات من الأعماق

شابة وشابت عشان النصيب
وقالت ميمكن (ربما ) جراح السنين اللى عدت تفكر تطيب
وقالت أجرب
حكاية مجرب
فوافقت ياعينى بأول خطيب
صحيح اللى عايش بيغرق ف حاله
معلق آماله فى قشة غريق
فقالت وماله
مادام مرتاحه له
مايمكن تكون النهاية البداية
وأشوف السعادة بحق وحقيق
ففرحت بأول قصيدة لقيس
وحلمت ب ليلى وعبلة ودليلة
وحلمت ب ليلة تكون العروسة
وتلعن يوميها سنين العنوسة
وترسم حياتها بإيد اللى خبط
وقادر يحلل رموز الأنوثة
وفرحت كتير
وحلمت بكل البنات اللى فرحوا
وشافوا بعيونهم طريق السعادة
وراحت تصدق كل اللى قاله
وقالت وماله مادام مرتحاله
كفاية ف وشه (وجهه) زبيبة العبادة
ونسيت في لحظة
بإن الايمان محله القلوب
وإن الخطايا
شوية نوايا
بترسم حياتنا شوية ذنوب
وإن الشيطان
عارفه الشيطان
مؤمن بربه وعالم وجوده
لكنه بيرفض يا ست الصبايا
مجرد يتوب
فقامت معارك
وقامت حروب
عشان بس كرسى مصيره الزوال
بيصنع حكايته بدم الشعوب
أقولك سؤال
عارفه الحكاية وأصل الحكاية؟
عمر الحكاية ما كانت فى آدم
أصل الحكاية
"أنا"
"أنا"
"أنا"
كلمة بسيطة بتهدم في عالم إسمه االقيم
ووصفه الغرور
تبقى السعادة ساعتها تغور
أصل الحكاية ف قلبك وقلبى
لما وافقنا نكون السكوت
رضينا بواحد بيحكم لنفسه
وقولنا لقلوبنا توافق تموت
عشان القوريب معلق بقشة
"مسمم يا ستى"
رضينا السعادة بلقمة وعشة
"رضيتى ووافقتى"
لكنه البعيد خلاصك لناسك
ويبقى إختيارك ف لحظة تأنى
وعمر اللى خبط وسابك زمان بتغرق قلوعك
ما يمسح دموعك
ولا عمره شافها
عشان الوحيد اللى ساكن ضلوعك
ماعاشى وشاف إلا ف وجعها
وعارف يا بلدى طريق السعادة
لكنه إختيارك!!!!
فرحتى بأول قصيدة ل قيس
حلمتى ب ليلى وعبلة ودليلة
لكنك في ليلة
هتصحى تلاقيكى حكاية فؤادة (زواج عتريس من فؤادة باطل )

مشكور يادكتور باسم