وانا ادري يا كلاب الحفل اني بالسجن بكره؟!!

اليكم القصيده يا جماهيري وهي خطره
وخلوا هالرقابه تسجن الشاعر وجمهوره

هدوءاً أيها الساده حضور الحفل والسهره
مساء الخير عالصاحي واشوف الناس مخموره

انا اسف على الازعاج ولكن طارت السكره
ذكرت اني قبل ساعات اصيل وعزوتي نوره

على فكره….الكرفته عجزت افكها عسره
ابي واحد ينزلها او أي وحده ومشكوره

وابي ثوبي.. جيبولي ثوبي الاشهب مع الغتره
قبل والله لاطربقها على هالحفل بحضوره

ولا واحد يتكلم قبل ما اخلص النشره
ومن يحكي قسم بالله لا ادوس برجلي حنجوره

تراها قفلت يا سادة بلادي ويا ستره
وهي ما دامها خربت باقول الليله الثوره

انا بحكي من اول يوم جيت لدنيتن قذره
وتكرم عن قذارتها بيوت الله ومعموره

انا مولود في ليلة شتاء مع بردها مطره
في خيمه وسط صحراء ما بها سستر ودكتوره

انا يا حضرة الساده غريب وضاع من صغره
لعن جدي زماني بين مدهوره ومهجوره

حملت من الشقا ما لا يطاق وجايكم بذكره
ولاني عاجز اتحمل واموت بنفس مقهوره

وانا ادري يذبح الرجال كثر الصبر في قهره
وعن قهر الرجال المصطفى حذر ومذكوره

وهم قالوا مفاتيح الفرج للحي في صبره
وانا اشوف الصبر مفتاح ضاع وزاد طابوره

تعبت ألملم ايامي بيدين الهم والحسره
تعبت المع البرواز وامسح غبره الصوره

تعبت ابوس كف الجوع وخشم الفقر طال عمره
تعبت اكذب على الحاجه واقول الحال ميسوره

تعبت احمس من القهوه واحط السمن والتمره
تعبت ودلتي وحده وكل شوي منثوره

احسب العز بالدله وبيت النذل به عشره
دلاله اكثر الملعون ومليانه ومصطوره

انا بحكم البداوه انزرع في داخلي بذره
عن علوم المراجل الف بذره فيني مبذوره

تربينا على الدين ونطيع الله مع شكره
تعلمنا نصلي ونحفظ القران وكل سوره

تعلمنا نحب الضيف وفينا الكرم فطره
تعلمنا نقول الصدق لا لفه ولا دوره

تعلمنا نحلب النوق ونعرف وش هي البكره
تعلمنا الضمى وحنا بايدنا البير محفوره

تعلمنا وكثير الي تعلمناه وش كثره
اخذنا درس بالدنيا بلا دفتر وسبوره

وانتم يا سكار الحفل عفوا ايها الزمره
من هو فيكم عرف قهر الزمان وظلمه وزوره

من هو فيكم وطاه الجوع وذله واصفقه فقره
من هو فيكم عرف يحتاج للقمه ونشف زوره

من هو فيكم من الضيقه حفر باصابعه قبره
من هو فيكم رقد ليله وسط اجساد مقبوره

من هو فيكم مشى حافي برمضن كنه الجمره
من هو فيكم سهر ليل الظلام بدون اباجوره

من هو فيكم ما طاح الفين مره وسلمت الجره
وانا من قبل اطيح وجرتي بيديني مكسوره

لكم الماء والوجه الحسن والمال والخضره
ولنا حنا الضمى والجوع وفقر وشيفتن عوره

ولا مره حظي ضحك بوجهي واشكره مره
وغيري مبتسم حظه وكل ايامه مسروره

كتبت الشعر من صغري وبيوتي ما بها كسره
وانتم تبرزون الي كتب بيتين مكسوره

انا يا حضرة الساده فقيرن ما اغتنى بشعره
مدام المومس الي تشري الاشعار مشهوره

وانا يا حضرة الساده هنا الليله وعلى فكره
ترى هالبدله مسروقه ورجلي بجزمه محشوره

ولكن قلت ابحضر هالحفل والعمر باختصره
وابي ابدع معاكم وسط ليله انس ومحذوره

واذا كانت رجولتكم بكاسة ثلج والخمره
انا بشرب بدون الكاس وثلجه الف قاروره

ابويه قال لي مره دسم شاربك بالغبره
ما يدري بالشنب محلوق وجابر فاقد شعوره

انا بامشي مدام الليل ودع وابتدى فجره
باروح ارد هالبدله على هالمعلاق مزروره

وانا ادري يا كلاب الحفل اني بالسجن بكره
مدام الليله جبت العيد بهذا الحفل وحضوره

وسلامتكم