تعالو وشوفو يعنى ايه كلمه بيئه ؟ $

والله معلش أنا عارفة إنها صدمة بس مش كل الناس بتلف العالم و تاخد صور جنب ميكي ماوس في الديزني لاند !!!

… لو بيتصوروا في المول فده لأن هو ده المكان الوحيد اللي يقدروا يروحوه.. و بيتصوروا بموبايل لأنهم ممكن يعيشوا و يموتوا قبل ما يمتلكوا نص ثمن الكاميرات اللي احنا بنتصور بيها ! كلمة ” بيئة ” دي ثقافة متخلفة !

ثقافة خلت إنك تبقى جامد أما تسافر اوروبا في الصيف..و تبقى معفن أما تسافر اسكندرية تقعد على شاطئ مجاني تستمتع بجمال بلدك بدون تكلف! خلت اللي يتكلم لغة انجليزية بطلاقة يبقى ليه الأولوية في فرص العمل و يبقى كووول!

و اللي يتكلم لغة عربية بطلاقة يبقى اهبل! خلت الناس تقرف من البلد في شم النسيم و الاعياد عشان الناس البسيطة بيقدروا ينزلوا و يخرجوا.. بنضايق من لبسهم من كلامهم من انتشارهم.. و عمرنا ما بنلتفت للسعادة اللي على وشهم! لو صورهم في المول هتسعدهم.. لو نزولهم البحر بهدومهم هيسعدهم.. لو أي حاجة بيعملوها بتسعدهم.. يبقى مش من حقنا نحكم عليهم انهم ” بيئة ” عشان بيفرحوا بالطرق المتاحة قدامهم! شيل الكلمة دي من قاموس حياتك.. و قدر الناس و طبقاتهم و بساطتهم و افرح لفرحهم و بصلهم كويس أكيد هتشوف شيء من الطيبة من الحب من العفوية من البساطة.. أكيد هتشوف شيء من بلدك.. شيء منك! ساعتها بس هتحس إنك إنسان.. و اللي أقل منك إنسان..