قيمة الفراق

والله إني كنت ألوم اللي يضيق إن غـاب خلّـه
لين جرّبـت المحبـه والفـراق وقلـت توبـه
لعنبو . جد المفـارق فيـه هـم . وفيـه ذلّـه
أثر كل الحـب لـذه والفـراق أكبـر عيوبـه
أمس . فارقت الغلا ومفـارق الخـلان علّـه
والعلاج الوصل لاتبلـش طبيـب ولا حبوبـه
الزعل هـو سبّـة الفرقـا يهّـز الحـب كلّـه
ليتني طولّـت بالـي قبـل لا يعلـن غروبـه
واهني اللي وسيع الصدر صـدره وسـع فلّـه
غلطة الصاحب تجي وتروح ماهي بمحسوبـه
عارفٍ قدره وقـدر اللـي يحبـه فـي محلّـه
ذاك نفسه لا حشا ماهي علي الحب مغصوبـه
سامـح الله طبعـي اللـي للتغـيّـر يالعـلّـه
قاضبٍ خلك عزيز . ولين صارت لي عقوبـه
ليش تحسب غلطة الصاحب علي الصاحب مذلّه
ليش ماتحسب ميانـه لوتجـي عشريـن نوبـه
لا وربي كنـت أحبـه حيـل مـادوّرت زلّـه
لا تشكك في غلاه . ولا تساعـد فـي هروبـه
لايمي . قبلـك تعبـت ألـوم شعـار المجلّـه
وكنت مؤمن في مقولة أعذب الشعـر الكذوبـه
وأثر كّلٍ فـي حياتـه لـه تجـارب مستقلّـه
وأنت لا تشره علي . مثلي . وتبلا لك بحوبـه
كـان جابتـك الحميّـه روح لـه تكفـا وقلّـه
لا يخلينـي وإذا ودّه يخفـف مــن ذنـوبـه
يستخير وله غـلا قلـبٍ صـدوقٍ مـا يملّـه
فدوةٍ له كل قلبـي مـن شمالـه لـي جنوبـه
يوم قفّا والخفـوق يفـوح عقبـه فـوح دلّـه
وسط وقدة واحدٍ عـزّ الشتـا والسهـر دوبـه
لاتقهوى . بـارده مـن بـرد فنجالـه وزلّـه
ثم قرّبها علي جـال الجمـر وأرهـى شبوبـه
ويـن يدلـه هالخفـوق وكـل مايدلـه يتـلّـه
طاري اللي ياكثر ما أتعبت رجلي في دروبـه
لاطرى . جريت ونّـة مـن بـلاده مستحلّـه
مثل ماراحت بلادي مـع شعـارات العروبـه
كل هاجوسٍ يجيبه جعـل شعـري فـدوةٍ لّـه
وأعذابي . كل ما جابت لـي الجبلـه هبوبـه
مشغلٍ قلبـي بحبـه دون خلـق الله . مـن الله
هيه . ياللي ممتلكني حسن وأسلـوب وعذوبـه
ماسمعت إن الخوي له بالخـوي تسعيـن زلّـه
وأنت طـوّف زلتـي ياعـل تفـداك اللعوبـه
صاحبي سيف الهجر . لاصرت تقدر لاتسلّـه
ماتظن العفو عند المقـدره أفضـل عقوبـه ؟؟
أيه أنا اللي كنت ألوم اللي يضيق إن غاب خلّه
لين . جرّبت المحبـه والفـراق وقلـت توبـه