الأخطاء الطبية التي تحدث في مستشفى الملك فهد بالمدينة

سأنقل لكم الرساله بالنص وفيها

يوجد بالمستشفى غرفة في قسم الجراحة مخصصه للأمراض المعدية و كان فيها مريض عنده التهاب في رجله

كان الصديد يخرج منها كأنك فاتح حنفيه اذا ضغطت عليه و البكتيريا الي في رجله من الانواع الشرسه الي صعب التخلص منها بالمضادات العادية ومحتاج نوع مخصص و سعره غالي يصل الى 1000 ريال ..

اراد الدكتور تبع الجراحة انه يمر على المرضى و الاولى ان يمر على المرضي السليمين من

العدوى و بعدين غرفة العدوا فا اختصارا للوقت قال الدكتور : عاوزين نمر على غرفة العدوا اول و بعدين الباقي ..

قلت : يادكتور هذا ممكن يعدي الباقين قال : و لا يهمك ماراح نختلط اوي مع المريض ..

فا راح الدكتور و كشف على المريض و بعدين راح و عقم ايديه بسرعة و مر على مريض في غرفة اخرى و كان شاب صار معه حادث و محتاج غيار على العملية و الله ثلاث ايام و بعدها نقلناه لغرفة العدوى .. لان العدوى انتقلت له من الدكتور البقرة .. الله اكبر نصحت الدكتور و رفض و نقل المرض للشاب .

و القصة الثانية :

كان عندنا مريض مصاب بسرطان في الدم و كان المريض رافض الاكل بسبب انه تعبان نفسيا من المرض لكن كانت صحته طيبه و يتحرك و يتكلم عادي تظن انه طبيعي فا امر الدكتور ان نوصل له .. لي .. للطعام المهروس عن طريق الانف الى المعده .. بعد فترة جا الدكتور علشان يغير له اللي فقام و حط اللي في انف المريض وحاول بشده و حاول و حاول لين دخل و عشان يتأكد يسحب عن طريق الابرة اذا ظهر ماء معناته اوكيه في المعدة .. المهم اعطى المريض الوجبه عن طريق الابرة يقول بعد ساعة او ساعتين المريض بدى يتعب قاموا و طلبوا الدكتور ولاحظ ان المريض يدخل في اغماء تدريجي على طول طلب دكتور المخ و الاعصاب الي امر ان يعملو له اشعة مقطعيه بعد الاشعة اتفاجئ الدكتور ان الصورة الملتقطه للمخ فيها جسم غريب و ممتد من اسفل الصورة وجدوه اللي الذي حاول الدكتور ادخاله بقوة الى المريض لان الرأس فيه فتحات لكن كان مغطاه باغشيه و الماء الي سحبه كان السائل المحيط بالمخ .. الله اكبر في لحظتها دخل المريض في غيبوبه و تنفس صناعي ساعات بس و توفاه الله .. اقسم ان القصة حقيقية ومعروفه في المستشفى لدي الدكاترة و الممرضين بس

و تم التكتم على الموضوع و سجلت اسباب الوفاة توقف الدورة الدموية ..

سبحان الله صرنا محل تجارب للاجانب

القصة الثالثة في نفس المستشفى :

استلمت القسم في احد الشفتات و لاحظت ان شاب في احد الغرف ملفوفه رجليه الثنين فا سألت ايش عنده قالوا هذا شاب صار له حادث ونتج عنه كسر في الرجل اليسرى و قرر الدكتور ان يعمل له عملية فا دخلوه غرفة العمليات و بعد التخدير فتح دكتور الجراحة رجل المريض و تفاجئ انه العظم سليم على طول راجع مذكرة المريض حصل ان الكسر في الرجل الاخرى .. و عمل العملية و لا كأن صار شئ و تعذر انه كان محتاج يأخذ جزء من عظم الرجل الاخرى و عدت بسلام على الدكتور … وبس بكل سهوله شفتوا ان المريض مظلوم و لا يمكن يأخذ حقه

القصة الاخيرة :

ايضا في نفس المستشفى و انا و الله من كان حاضر سيناريوا القصه كلها لانه كان بداية دوامي الصباحي

كان فيه شاب طاح على راسه و ادى الى تجلط دم صغير جدا في المخ و لا له أي اثر على حياة الشاب و الدليل انه كان يراجع العيادات الخارجية لمدة اسبوع او اكثر و في هذاك اليوم دخل على الاستشاري و اخذ يطالع الاشعة و الفحوصات فا قال لزميله الاخصائي بالغة الانجليزية انه راح يعمل للمريض هذا عملية يخرج الدم المتجلط من المخ فا قال الاخصائي انت متأكد قال نعم اقدر قال اوكيه فا قالوا للمريض انهم راح ينوموه و يعملوا له عمليه بسيطه و راح تنحل مشكلته والشاب وافق و دخل غرفة العمليات تحت اشرافي و وجودي المهم دخل الساعة سبعة طلع الساعة ثمانية او تسعة من العمليات و الشاب متغير شكل وجهه بشكل بسيط حاسس ان فمه مايل شوي بس .. المهم دخلته غرفة التنويم و كان حاطين له لي من راسه الى كيس يشفط الدم المتجلط يقول صاحبنا لاحظت ان الكيس مليان دم قلت يمكن علشان انه لسه عامل العملية .. خليني اغيره يقول و الله مجرد بس صبرت دقيقه او دقيقتين و امتلئ الكيس الجديد الفارغ قمت و غيرته مره ثانيه ايضا امتلئ بسرعة على طول اتصلت بالدكتور و جاء و طلب انه يرجع للعمليات و رجعنها الساعة تسعه او اكثر طلع من العمليات لكن و للاسف المريض كان اسوء من اول فمه خلاص صار كله مايل لليسار وايديه زي المشلولين بعدها المريض تعب اكثر و اكثر طلب الدكتور ان يعمل له اشعة طلعت صورة الاشعة و اتضح ان فيه نقط سوداء في المخ امر الدكتور ان ايضا يرجع لغرفة العمليات لان الهواء دخل المخ و لازم يخرجه يقول صاحبنا ساعتين بس و المريض طلع يتنفس تنفس صناعي و داخل في غيبوبه .. قلت للدكتور يا دكتور اخوه موجود هنا ايش راح تقوله .. قال طيب طيب مو مشكله .. قال لاخوا المريض هذا اخوك فيه تجلط وتعرف التجلط صعب السيطرة عليه و ادى ان اخوك يوصل للمرحله هذي لكن راح يتحسن ان شاء الله يقول صاحبنا و الله بس اسبوعين وبعدها توفاه الله

يا اخوان و الله هذي القصص مو من نسج الخيال او مبالغ فيها لا و الله وكل هذي القصص صارت في مستشفى حكومي واحد و مستعد اذكر اسم المستشفى

و هو مستشفى الملك فهد بالمدينة المنورة لكن كم مستشفى عندنا في المملكة

لا نضحك على انفسنا و نقول احنا متقدمين احنا عندنا احسن اطقم طبيه و احنا واحنا يارجال شبعنا كلام و بربره

بالله عليكم مو حرام الي يصير في مستشفياتنا من قبل ناس الله اعلم هل تحصلوا على الشهادة بجدارة او تحصيل حاصل بس

ياناس يا عالم هذي ارواح ماهي حيوانات تجربون فيها اتقوا الله حرام عليكم .. كم و كم من قصص شبيه بهذي القصص لكن الدكتور من يقاضيه اسهل شئ يقوله حالته كانت تعبانه او يجيب عذر انت ما تفهم فيه … لكن لهم الله يحاسبهم يوم لا ينفع مال و لا بنين