مقتطفات من اجمل قصائد البدر ( بدر بن عبد المحسن ) الغنائية
حبيت ادور على بعض القصائد للشاعر اللي اعتبره انا افضل شاعر في بلدي حالياً وهو سمو الامير بدر بن عبد المحسن
واتمنى ان القصائد تليق بذووقكم وتقبلوا تحياتي اترككم مع القصائد
عظم وغظاريف
في دربـكم يا راحلين منا منـاكيف
تـالي ليـالي القيظ و أول خـريفه
ردّوا سـلام أهل القلوب المـواليف
على الوليف اللي نشــد عـن وليفه
ردّوه لعـذوق النخيــل المهـانيف
وعلى القصـور اللي بـوادي حنيفه
دارٍ لهـا بالقلب عشــق وتـكاليف
يـاعـل عيـن مـاهـوتها كـفيفه
طـبنا وشـبنا وأتـعبتنا المشـاريف
والمـرقب العـالي هبـوبه عـنيفه
يا وارديـن العـد..كفـّوا المغاريف
اللـي بقـى دمـع هـماجٍ ذريـفه
والله لــو دمّي يـغيث المـلاهيف
قطعت عـرقي ليـن يصفى نـزيفه
ويا حظ من لا عرف منهو ولا شيف
إن طـاب..يحمد وإن تـردّى..بكيفه
وحنا ورثنا العـز عظم وغضاريف
لا مـا ورثـنا العـز تـاج وقطيفة
القاع..والمسافة
أنا احبك ..مابها زيف وخداع
رغم الذي نخفيه ..واللي نخافه
اودعك..لو الألم لحظه وداع
الى مضت..ننسي الألم والحسافه
وافارقك..لو السفر ..يم وشراع
وبعد الفراق .. اللي نوده نعافه
لاصار مافي البعد راحه لملتاع
با الله وش نفع العتب والكلافه
من الجفا والصد .. يكفيني اذراع
لاجف نهر الحب ماتت اضفافه
أملي يدك رمل وترى هاذي القاع
ومدي النظر .. تدرين وش هي المسافة
سلمى
اللـي طعنّي بين الاضـلاع وأدمى
هذاك نــدٍ لي ونعمـين فارس
ومن ينطح الوقت الردي قلبه أعمى
كم عامـرٍ خـلاه بالقاع دارس
يـابنت مـالي قلب بـالحب يرمى
كفي سهـام الفاتـرات النواعس
المـا عيـوني أظهـريني مـن المـا
وأنـا غريـق الدمع والريق يابس
ظميـان من مثلي من النـاس يظما؟
وأنـا علـى أحلى الينابيع حارس
والله يالـولا فيّـة عيـون سـلمى
ماشوف كل الناس ضاحك وعابس
مـن طـاب لي بالنـور ماني بظلمة
ومن جـادلي بالغيث مـاني بحابس
سارة
من كُتب الحب العتاق .. وتاريخ القراق
وستاير الدمع الرقاق ..
جمعت قلبي غبار .. وقطع فخار ..
ومن على المرمر البارد ..
ومن ما نسته النار .. من غيمي المحروق ..
وحملت عيوني وركبت أول سفينه تبحر ..
على وجهي الاصفر .. خريفٍ طال ..
وسلال من رذاذ وملح ..
وفي صدري حجارة نسيوها بحاره ..
مروا علي فـ يوم ..
وقالوا تعال معنا .. وما كان يجمعنا ..
إلا الضياع والريح ..
راجع من الايام .. من الاحلام ..
ومن الف سناره .. مغروسة بقلبي ..
لقيت لي بشارة .. ما اغلى عطا ربي ..
أثر العمر ساره .. وموج البحر ساره ..
وكل المدى ساره ..
سافرت كل العمر .. وراجع احب سارة ..
أبعتذر
ابعتذر .. عن كل شئ ..
إلا الهوى ..ماللهوى عندى عذر..
ابعتذر ..عن أي شي ..
إلا الجراح ..ماللجراح إلاالصبر ..
إن ضايقك انى على بابك أكر ..
ليلة ألم.. واني على دربك مشيت عمري وأنا
قلبي القدم …
ابعتذر ..ابعتذر …كلي ندم …
عن كل شئ .. إلا الهوى ..
ماللهوى عندي عذر …
اتصدقي …ماخترت أنا أحبك ..
ما احد يحب اللي يبي ..
سكنتي جروحي غصب ..
ياحبي المر..العذب …
ليت الهوى وانتى …كذب
كان اعتذرلك عن هواى ..
وماأقول أنا كوني معاي ..
ان ضايقك انى على بابك امر..
ليله ألم …
وانى على دربك مشيت عمري وأنا ..
قلبي القدم …
ابعتذر ..ابعتذر .. كلي ندم ..
عن كل شئ .. إلا الهوى ..
ماللهوى عندي عذر ..
الله كريم ..حبك ..يكون..
همي القديم ..
وجرحي القديم …
والله عليم .. يا أحلي العيون ..
ان الفراق .. جزا الفراق ..
ابوعدك ..كان الطريق بيبعدك ..
بامشي بطريق ..
وكان الجحود بيسعدك …
مالي رفيق ..
ابجمع اوراق السنين ..وأودعك..
كان الفراق اللي تبين … الله معك ..
اتمنى ان تنال القصائد على اعجابكم واقبلوا طرحي المتواضع
