قبل اسافر كنت جالس في زمان الأنتظار
ارتشف هم المكان .. و كل همي حاجتين
كنت خايف من يباس .. و كنت خايف من خضار
كنت اخاف انك تجين و كنت خايف ما تجين
لين شفتك من ورا بيبان صالات المطار
مقبله من كثر شوقك .. كنت اشوفك تركضين
مرة ركضك يمين و نظرة عيونك يسار
و مرة ركضك يسار و نظرة عيونك يمين
تايهة .. ما كنك الا ضحكة وسط انكسار
ساكته .. ماكنك الا دمعة فيها حنين
خايفة .. وجلة .. حزينة .. يعني كنتي بأختصار
تشرحين لكل جاهل معنى كلمة ( عاشقين )
بعدها جيتك ولدت عينك و دار الحوار
من كفوفي دمعتين و من كفوفك دمعتين
كنت اصد و كنتي انتي ثايره مثل الشرار
ماعلى لتغة لسانك غير كلمة ( وين ؟ وين ؟ )
واذكر اني رحت قبل ابدي لك اية اعتذار
رحت حتى قبل اطيب خاطرك في كلمتين
لكن انتي عارفتني زين واللي صار صار
سامحيني واذكريني قد مانتي تقدرين
اذكريني لانتهت للشمس رحله مع نهار
واذكريني لاصحى للصبح ورد الياسمين
واذكريني لا لمحتي في ليالي البرد نار
واذكريني لا سمعتي للمطر صوت حزين
اذكريني واذكريني واذكريني .. بأختصار
..اذكري ضحكة حبيببك قد مانتي تقدرين !
كلمات جميلة
يعطيك العافية وننتظر جديدك
ودي
مشكور لطرحك اخي
احترامي وتقديري
