أحب أبي حمد البريدي 2024 , قصيدة عن الاب , شعر حب عن الاب

مثل مسرى غيوم صيف على رووس الجبال
…..وامطرت في وادي الجوف وابرق ليتها

داري انك من لياليك عسرت الثقال
…… وتحكر الونه عن الناس ماونيتها

والله ان دموع عيني لو تعين مجال
……… كان حتى قبال ذا الناس مارديتها

بس اخاف تحز نفسك وتسألني سؤال
…………وانت داري دمعتي ليه لاهليتها

لو جروح الوقت من جوف شاقيها تشال
………كان ابن عدوان ماصاح واصبح ميتها

هكذا الدنيا وحنا كذا في كل حال
………وهكذا صدوف الليالي ولو داويتها

انت ابي واخي وعمي وربعي والخوال
……..وكفتك ترجح على الناس ماساويتها

جلستي جنبك غنيمه والى سرت اعتدال
…….انفهق من جرة خطاك ما عديتها

خذت منك المعرفه والقناعه والعدال
…….وكل كلمة منك قدوة ليا وصيتها

يايبه ياحاكم الطيب ياريف الجزال
…………. اتقاوى بس مدتك ماقاويتها

يوم اعد اسمك ورسمي على عيون الرجال
………..اتنومس كل مارحت والا جيتها

جعلني ماذوق حزنك على طول الليال
……….. جعل يومي قبل يومك ياربي ليتها

شوفتك طيب ومرتاح تسوى راس مال
…….. جعل ذا الدنيا فدا ضحكتك لاريتها

الكلام يعانق الصمت واذا به مثال
…….. كلمة من قاصي الود ماكنيتها

يايبه ما اوفيك حقك .. وحقك مايطال
………حتى لو دنقت لرجيلك وحبيتها