يا ضميري لا يهمك من الدنيا هموم

مالزمان اللـي تحـدى قوييـن العـزوم
لين مشاها علـى ود مـا هـو ودهـا

والمجامل بعض الأحيان ما يقضي لزوم
لابو النفـس الضعيفـة ولابـو جدهـا

مير تجبرنا العوايـد وتجبرنـا السلـوم
نكتـم الاسـرار ياليـن تاصـل حدهـا

الردي لا طاح جعلـه يطيـح ولايقـوم
باح سـده والنشامـى ماباحـت سدهـا

كل ما كبرت وضاقت على عيال الرخوم
نحتزم لأكبـر مصيبـة وناطـا خدهـا

جعل قسمي عند ربي من خيار القسـوم
واحـدٍ يعـط العطـايـا ولا يرتـدهـا

يا عيـال آدم وحـواء تراهـا ماتـدوم
دورة الأيــام لا بـدهـا لا بـدهــا

يا وليد البط وشلون مـا تقـدر تعـوم
وأنت أبوك يعوم جزر البحـور ومدهـا

وأنت يا حلمٍ حلمته ما هو مثل الحلـوم
ياضحية مزح الأحـلام مدري جدهـا

أدري إن فالناس معطى وفالناس محروم
هيه يا بيـض النوايـا ويـا مسودهـا

يا ضميري لا يهمك من الدنيـا همـوم
الصعيبـة حِلْهَـا والبسيطـة عـدهـا

إن جات في شد الشوارب وفي قرب الخشوم
كبر الضيفه وعش الضيـوف وغدهـا

والمراجـل ماتوفـى بضافيـة الهـدوم
كود بسيوفٍ يشـوق النواظـر حدهـا

والردي لو دَرَس المرجلة في كـل يـوم
المراجـل عنـد أهلهـا يذعـذع ندهـا

يعتبر قسمه مثل قسـم زاهيـة الرقـوم
يوم تكحـل عينهـا والقـرون تكدهـا

ماكسبت الا رضا اهل النمايـم والعلـوم
يا رسول الحكي هات العلـوم و ودهـا

يعطيكـ الف عافيهـ خيو على روعتهــآ

تسلم الانامل

الأروع تواجدكِ الدائم وإطلالتكِ الرائعه

الله يعافيكِ من كل شر

مراحب هموسه