والله ماتسوى الحياة نزعل الغالين !!

إفرضي اني طلعت وكنت متنرفز كثير
ورحت من عندك مضيع في الأماكن والجهات..

بعد مااشتد الخلاف بوضعنا واصبح مثير
قلت :أهدي والعن الشيطان واطلع في سكات..

إتجهت..وسايقن سيارتي عكس المسير..
وصار لي حادث..ومت..وخبروك :فلان مات؟

علميني..عندها بالله وش ممكن ييصير؟
لوعرفتي من عقب زعلتك..فارقت الحياة..

تلطمين خدودك..تشقين ثوبك..مايضير..
دامك تلومين نفسك بعد مافات الفوات..

ليه ماقلتي لي: إقعد والزعل ملعون خير..
ووالله ماتطلع كذا باعصاب مافيها ثبات..

ليه خليتيني أمشي حالتي حالة ضرير..
ولا يعني كان حبك ..حب انانية وذات..

وليه انا من بعد كنت الشخص الاول والاخير..
في حياتك وبسهوله صرت مثل الذكريات..

والله ان تبطين وانتي ما على شفتك غير..
اسمي المكتوب ضمن اوراق تقرير الوفاة..

تندمين العمر كله ..أو..يأنبك الضمير..
مافرقت .. مادمت ماضي ..في ملفاتك ..وفات

بس يبقى ذنبي برقبتك ..وانا الصب الاسير..
اللي كبلني غرامك والوفا والتضحيات..

جربي الدنيا بدوني .. كيف واقعها مرير
وكيف لا عزوك فيني وصرت قدامك ..رفات..

تدركين بوقتها معنى العبوس القمطرير..
وتشعرين انك يتيمة اهل واخوان وخوات..

وتذكريني .. تذكرين الشعر ..وانسام العبير..
والعطر .. والورد .. وألبوم الصور .. والأغنيات..

والسوالف والغنا وإهدائنا عبر الأثير..
والإضاءة الخافته..والليل وأحلى الأمنيات..

والرسايل .. والشموع اللي في مأوانا تنير..
والمجلات القديمة .. والكتب .. والملزمات..

والهدايا من قطع الماس وعطور حرير ..
والأثاث اللي خذا حمرته من لون الشفاه..

والبحر والصيف والشاليه والثوب القصير..
والشتاء واحظانك اللي غير كل المدفئات..

والإجازة والسفر والعيد والمطر الغزير..
والمقاهي .. والمطاعم .. والطرق .. والتمشيات..

وإسمي اللي مخزن بجوالك الباندا الصغير..
أجمل الإحساس .. لكن..مات ياست البنات..

ذكريات تحاصرك من كل صوب وتستثير ..
دمعتك في كل غمضة وانتباه وإلتفات..

عن حكاية حب في هالوقت منقطع النظير ..
حب يكرم عن ردى الشهوه.. وألسنة الوشاة..

حب مدري ويش بكتب عنه؟ لكنه كبير..
أكبر من احساس أصدق شاب مع أوفى فتاة..

بس .. لا تبكين .. يبقى كل ماقلته نذير..
وافتراض لكل مايمكن حدوثه لي ,, وآت

لجل ذلك فكري وش هي النهايه والمصير؟؟
كلها حفره وجمع من الملا.. عقب الصلاة

والله ماتسوى الحياة نزعل الغالين مير..
ساعة الضيق يتعكر صفو الأنفس والذوات..

ليش اجل مانستغل الوقت دام احنا بخير..
وليش مانرضي حبايبنا .. ويلتم الشتات ..

يعني لازم ننتظر؟ والواقع أيامه تطير..
واحنا ماندري نبات الليل .. ولا .. مانبات.؟؟

العشير أصلا يحز بنفسه يزعل عشير..
الله أكبر .. كيف ماحزت بنفسك هالسوات ؟؟

يوم شفتيني طلعت ووضعي النفسي خطير..
وقتها .. اشدراك يمكن موتتي حانت وجات..

فاحرصي دايم علي.. ولا تغيظيني كثير..
واذكري دايم شعورك لا دريتي وقيل ..مات…

لـ رااائع محمد الشهري

ممـا راااق لذائقتي

اشكر مرورك العذب بين احرفي المتواضعة

والله يعطيك العاااافية

لا خلا ولا عدم

أرق التحـايا

اسعدني مرورك العذب والرااائع

والذوووق منكِ وفيك يالغلااا

لا خلا ولا عدم

حبي وودي لرووووحكِ

اسعدني مرورك العذب والممــيز

والله يسلم قلبك وغاليك

أرق التحــايا أعذبها

يسلملي ذوووقك ياكل الذوووق

وماأنحرم من طلتك الحلووووة

حبي وودي لرووووحكِ