بسم الله ذي الإكرام الرب الكافي العلام
ولدى الغالي عبد الباسط بابعت لك ميت ألف سلام
بعتالك أسأل واطمن قلب الأم علهش ملام
ع الفكر وع الخاطر دايما يا ما بشوفك في الأحلام
مشتاقة مشتاقة يا ولدى نور عيني يا أغلى الأرحام
عامل إيه في السجن يا ولدى وعملت فيك إيه الأيام
آه طمنى وقولي وحكي ولو تقدر ابعت لي سلام
ويا ولدى إيش حالك عامل صحة وعافية، كله تمام ؟
ولا يا ولدى السجن دا أثر خلاك كده جلد على عظام ؟
بسأل ربى دا يحفظ بدنك أنت وإخوانك لكرام
م الأمراض ويبعد عنك الشافي كل الأسقام
مشتاقة مشتاقة يا ولدى نور عيني يا أغلى الأرحام
بادعيلك ليلى وف نهاري بعد صلاتي وقبل صيام
بادعيلك يوماتى ليلاتي ولما الناس تكن تنام
بادعيلك من قلبي يا ولدى رب يفك أسرك دا العام
ويفرج كربك وإخوانك ويمكن دين الإسلام
مر يا ولدى من آخر شوفة ست أشهر وسبع تعوام
ويا عالم راح اشوفك تاني ولا خلاص حسن الختام
ويا ولدى يا ولدى أنا بادعيلك وان شا الله زى ده الايام
دى المفترجة تكون دا معانا بين أخوالك والأعمام
وأعيش وأشوفك متهنى وأشوف لك عزوة لقدام
مشتاقة مشتاقة يا ولدى يا ضناي يا أغلى الأرحام
بادعى الرب يثبت قلبك ينصركوا الهادي العلام
وأنت في سجنك خليك راجل دايما كون ده أسد ضرغام
وأوعى يا عبد الباسط تضعف واوعاك تبكى ولو إعدام
عايزاك يا وليدي كده مؤمن المسلم عمره ما ينضام
فاكرة يوم قبضوك الشرطة يوم ده عليك رحت الأقسام
قلبوا البيت يا وليدى يومها صرخت أنا قلت قوام
عبد الباسط آهو ف حاله ومالوش ف سلاح وألغام
عبد الباسط عابد ربه وللقرآن دا هو م الخدام
م البيت للجامع وبيرجع وحياته دى صيام وقيام
حكم القوى ع الضعفا يا ولدى وربك قوى عمره ما بينام
مشتاقة مشتاقة يا ولدى يا ضناي يا أغلى الأرحام
قولي يا ولدى موش عايز حاجة؟ نفسي أبعت كراريس وأقلام
علشان تكتب لي تطمنى ده كلامك فيش بعده كلام
بس قالوا لي السجن دا منعه وكلام المأمور إلزام
لما حاتفتح وآجى أزورك حادبح لك جوزين حمام
وحافصلك كسوة كويسة شورتين وقميص بكمام
لأجل البرد شديد حداكم وما يصيبك ولا حتى زكام
ولا تحتاج مستشفى عيادة ولا تحتاج لدوا وبرشام
أنا كل هلال كده بابعت لك دا حواله ووياها سلام
شهر بشهر يا ولدى ما بنسى واللي بينسى ضناه يتلام
مشتاقة مشتاقة يا ولدى يا ضناي يا أغلى الأرحام
حكيني وقولي على أخبارك ويا ولدى فاضلك كام ؟
قربت تخلص دى المدة ولا ده لسه فيه أحكام
نفسي دا تيجى سجن أسيوط زى أخوك رأفت أبو حسام
تقرب منى يا ولدى دا حتى تاخد زى عشر تيام
وآهو برضه أشوفك واطمن وأجيبلك وركين وإدام
رب يا ولدى ييسر أمرك ويلين قلب الحكام
ويفرج عنك وإخوانك حتى إخوانك في الإعدام
ونهاية مرسالي أدعيلك بالصحة وبالعافية دوام
مشتاقة مشتاقة يا ولدى يا ضناي يا أغلى الأرحام
من قلب الحاجة أم عبد الباسط
سلمت لنا الانامل بما اتيتا به
لا خلا ولا عدم من التميز والابداع
تقبل: كل الاحترام والتقدير
شـكــ وبارك الله فيك ـــرا لك … لك مني أجمل تحية .
تسلم أيدك المعاقب
تحياتى
نورة الصفحة اسير الحرمان
مشرف الاخبار